Bizkaia Talentek laguntza ekonomikoen eta beken programak kudeatzen ditu Bizkaiko arlo estrategikoetan, kualifikazio handiko pertsonentzat.
Bizkaiko sektore estrategikoetan kontratazioa, prestakuntza, ezagutza eta goi-mailako gaitasunen garapena sustatzeko helburuarekin, 8,5 milioi euro baino gehiago bideratu ditugu gure laguntza- eta beka-programetara talentua duten 270 pertsona baino gehiagori laguntza emateko, Bizkaiak egungo eta etorkizuneko erronkei erantzun ahal izango dieten profesionalak izan ditzan, batez ere arlo hauetan: automobilgintza, biozientziak, aeronautika, sormena eta berrikuntza, trantsizio energetikoa, telekomunikazioak, zilarrezko ekonomia, big data eta ekipo-ondasunak.
TALENTUA ERAKARTZEKO PROGRAMA
Talentua erakartzeko programaren helburua da Euskaditik kanpo bizi eta lan egiten duten goi-mailako pertsonen kontratazioa sustatzea, beren ibilbide profesionala Bizkaian garatzen jarrai dezaten.
Laguntzaren zenbatekoa eskaerarekin batera aurkeztutako kontratuak edo kontratazio-proposamen irmoak jasotako urteko soldata finko gordinaren %20 izango da 2024. urtean eta %20 2025ean. Diru-laguntzaren gehieneko zenbatekoa 30.000 euro izango da, guztira.
Kontratatutako profesionalek honako baldintza hauek bete behar dituzte:
- Unibertsitateko gradu-titulua edo lizentziatura edukitzea.
- Lanaldi osoko edo partzialeko lan-kontratu bat edukitzea, lan-harremana enpresa eskatzailearekin 2023ko urtarrilaren 1aren ondoren hasi bada; nolanahi ere, 2024ko irailaren 30ean kontratuak mugagabea izan beharko du.
- Lan kontratua ez izanez gero, kontratazio-proposamen irmoa edukitzea, erakunde eskatzaileak eta kontratatuko den pertsonak sinatuta. Edonola ere, lan-kontratu mugagabea 2024ko irailaren 30erako formalizatuta egon behar da.
- Formalizatutako lan-kontratuak edo kontratazio mugagabeko proposamen irmoak urtean gutxienez 40.000 euroko ordainsari gordina izan behar du.
- Kontratatuko den jardueraren eremuan gutxienez 5 urteko lan-esperientzia izatea.
- Beren lanbide-jarduera EAEtik kanpo egin izana, gutxienez 36 hilabetez, kontratazioaren dataren aurreko 48 hilabeteetan.
Eskabideak aurkezteko epea: 2024ko apirilak 8 – 2024ko irailak 13
Talentua Erakartzeko Programa 2024
SEKTORE ESTRATEGIKOETAKO HOBEKUNTZA PROFESIONALEKO PROGRAMA
Sektore estrategikoetako hobekuntza profesionaleko programaren helburua da Bizkaiko sektore estrategikoetan graduatu direnen prestakuntza kualifikatua babestea, lurraldeko enpresek etorkizuneko erronkei aurre egiteko behar dituzten kualifikazio handiko profesionalen beharrizanari erantzuteko.
Laguntzaren zenbatekoa matrikularen zenbatekoaren % 75 izango da, eta dirulaguntzaren gehieneko zenbatekoa 3.000 eurokoa.
Onuradunek baldintza hauek bete behar dituzte:
- Bizkaian jaio edo 2022ko urtarrilaren 1a baino lehen bertan erroldatuta egotea.
- 2021/2022, 2022/2023 ikasturteetan graduatutakoak edo 2023/2024 ikasturtean graduatuko direnak izatea.
- Gehienez ere 30 urte izan behar dituzte.
- Euskal Autonomia Erkidegoko unibertsitate batek 2024-2025 ikasturtean trantsizio energetikoaren esparruan edo zientzia eta teknologia kuantikoaren alorrean emandako espezializazio-master bat egiteko ikastaroko kreditu guztietan matrikulatzea.
Finantzatu beharreko masterren zerrenda:
- Hidrogeno Teknologien Unibertsitate Arteko Etengabeko Prestakuntzako Masterra
- Automatizazioa, Elektronika eta Industria Kontrola Unibertsitate Masterra
- Kontrol ingeniaritza, Automatizazioa eta Robotika Masterra
- Energia Berriztagarrien Integrazioa Sistema Elektrikoan Masterra
- Sistema Elektroniko Aurreratuak Masterra
- Energia Biltegiratzeko eta Eraldatzeko Materialak Erasmus Mundus Masterra
- Ingeniaritza Energetiko Iraunkorra Masterra
- Kontrola Sare Elektriko Adimentsu eta Sorkuntza Banatuan Masterra
- Industria Ingeniaritza. Energia-eraginkortasuna Masterra
- Zientzia eta Teknologia Kuantikoak Masterra
Eskabideak aurkezteko epea: 2024ko irailak 10 – 2024ko irailak 30
Sektore estrategikoetako hobekuntza profesionaleko programa 2024
