Bizkaia Talentek Londreseko Be Basque Talent Network indartu du ondo baino hobeto prestatutako euskal profesionalekin egindako topaketa berriari esker
2017/10/06
Urriaren 5eko arratsaldean, osteguna, zazpigarren urtez jarraian Naturejobs Career Expo azokan parte hartzen zuela eta, Bizkaia Talentek nazioarteko Be Basque Talent Meetingen beste edizio bat antolatu zuen Londres inguruan bizi diren goi-mailako prestakuntzadun profesionalekin.
Ekitaldian, era guztietako profil akademikoak zituzten berrogeita hamar bat lagunek parte hartu zuten: batzuk ingeniaritzaren, marketinaren edo zientzien arlokoak ziren; eta beste batzuk, automobilgintzaren, aeronautikaren edo biozientzien arlokoak. Topaketan bertan, Bizkaia Talenteko zuzendari gerentea den Ivan Jimenezek hurrengo urteei begira Euskadin eskari handieneko profil profesionalak eta lan-aukerak zein diren azaldu zuen. Horretarako, Euskadiko zenbait kluster-elkartek emandako datuak eta informazioak hartu zituen kontuan.
SAREAK SENDOTZEA
“Topaketa hauen bidez, kanpoan lan egiten duten euskal herritarren arteko sareak sustatu nahi ditugu, Euskadirekin lotune proaltibo bezain iraunkorra izan dezaten eta Be Basque Talent Network behar bezain sendoa izan dadin”, adierazi zuen Jimenezek. Euskadirekin lotuta dauden edo egon nahi duten profesionalen sare handiena da, eta, gaur egun, 90etik gora herrialdetako 9.000 profesional baino gehiago dira bertako kideak, baita 350 euskal erakunde eta enpresa baino gehiago ere. Aurten, beste Be Basque Talent Meeting batzuk egin dira talentua erakartzeko orduan estrategikoak diren zenbait puntutan; esate baterako, Dublin, Zurich eta Massachussets.
